Değerli yazarımız Yenemıko Mevlüt Atalay şiirleriyle halkımızın acılarını ve özlemlerini sonsuzluğa taşıyor...

 

«Гъэмэфагъа,
     Лъэпкъым
         Ыгу
Лыгъо зырадзэгъагъэр,
         КIымэфагъа?..»
ПIоу укIэмыупчIэжь!

Уахътэр хъошъанэм ихьагъ.

Къафихьащт
     ГуIагъом
         Ихьылъэ
             ЗыхашIэ
ТIэмынэу ежьэгъэ нэкьыгъэмэ.
Янабгъохэр абгынэ
Уашъом шъхьафитэу щыфарзэщтыгъэ
             Бгъэжъмэ.
Гъэтхэпэ ос ныкъоткIу псы орым
Адыгэ ятIэ рихьыжьагъ.

Мафэхэр гъырнэкIух,
Мафэхэр гукIэгъунчъ,
Мафэхэр хьадэгъэ шъэф,
Шъэфрытхъоу къахэтхъо,
Тыгъужъ нэкIу мысэйхэм
Лъэпкъыр зэрапхъо!
Шъхьэрауты
Илэс минмэ
Шъхьафит жъуагъоу къахэлыдыкIыщтыгъэ
     ПаIор адыгашхьэм,
Гъэр ашIы адыгэ нэкIур!..

Мэшъыгъо минхэр,
Мэшхыдэ минишъэхэр,
Агухэр зэIупкIагъ
Зынэхэр щыбэгэжьыгъэ мелыванмэ...

Къолэбзыухэр мэгуIэ,
Псыхъомэ ашхьэ раутэкIы мыжъожъмэ,
Алъапсэхэр мэгъу чъыгыжъмэ...
ЛIэшIэгъухэр зыгъэIушыгъэ адыгэмэ
Яхэкужь абгынэ.

Ылъэгъугъэп нэпэ къэсыфэ цIыфым
Зы лъэпкъыр зэрэщытэу
Псыхадзэ зышIышъушт гупшысэ!..

Абхъаз ныор
ХыIушъом
Iус.
Хыр нэпкъым къызтелъадэкIэ,
Хыпсыр ыIэгу из ешIы, дэгущыIэ.
ЗыIуилъэсыжьыкIэ гъунапкъэм,
Ыгу
     ДэкIуатэ:
Хым зеIэты,
Гум зеIэты...
Гур мэлъатэ,
Хым зепхъуатэ...
Къухьэхэр дэ шIуампIэм фэдэу зэредзэ хым...
Хыр мэятэ:
ЗыкъиIэтэу зыридзыхы къэс
Къухьэм къезы
Зы сабый,
     Зы бзылъфыгъэ,
           Зы лIыжъы...
Сабыйхэр,
     Бзылъфыгъэхэр,
           ЛIыжъыхэр
Зэ къушхьэм,
     Зэ машэм еолъагъо...

ГуIэгъурытхъомэ аIэ зыубытын щыIэп!
Мэшхыдэ хыр:
-«Джыри!..»
     еIо,
Псыор чIэгъым чIэлъашъо къухьэхэр.

Адыгатхьэхэр ашъхьэщытых къухьэисымэ,
ГуIагъом хэтых...

Гур мэлъыхъо:
Хы Iушъом Iус абхъаз ныом ыгу
ЗыIус хым фэд,
Уцугъо иIэп.
КъыгурыIорэп
Адыгэм
     Иш
Къыщинэу зыдэкIошъурэр.
Къухьэм къизырэ цIыф пэпчъ,
Псыормэ афэдэу мэчачэ
Мылъкум анэхэр щызыпхагъэ кьухьэзефэхэр,
Созэрэщ егьэшIагъо:
-Сыд шъуIуа
     Зыр зыгъэгъэу
           Адрэр зыгъэдэхьащхырэр-?

Хым зеIэты,
Гур лъэкIуатэ.
Гум зепхъуатэ,
Хыр мэятэ.
Гум зыредзы,
Хыр кIырэу.
Гур мэбанэ...
Гур мэлъыхъо...
Гур мэIабэ...
Гур мэшхыдэ...
Гур!..
Гур!..
Гур
мэ-
-кIо
-ды!..
Хым пхырэбы.

Хы Iушъом Iус
Абхъаз ныом
Ибын унагьо щыгъупшэжьыгъ,
Ынэхэр хым тедыягъэх.
Псыормэ адэбэгы ыгу,
Гъунапкъэм къеорэ хым дэкIуатэ.
Хым игурым адыгэ макъэм фегъадэ.
Ошъо чапэм шIуцIэгъакIэ щилъэгъу къэс
ФэмыIажэшъоу ыгу къытео:
-Хым къыIэкIэкIыгъ,
КъесылIэжьы силъэпкъэгъухэр-, еIо.
Iэ щефэ хым, едэхашIэ.

ХЫТХЬАЛЪЭIУ
Иныри оры, кIочIэшхо зиIэри оры. О зэпырыпщыгъ тилъэпкъэгъухэр, о къытфэщэжь. УнэшIу къытщыгъаф къагъэзэжьы зыхъукIэ. ТызэшIужьын: Илъэсишъэ зыIутымгъэфагъэ уимыхьамели пфэтшхын. Къызыхэдзыжь адыгэ Iэмэпсымэхэри, зэрэбгъэбылъыгъэхэр икъун. ТызэIубгъэкIэжьымэ, псэр къурмэн пфэтшIын.


Yazan ve seslendiren Yenemıko Mevlüt Atalay

Мы Усэм ЦIэ ИIэп / Bu Şiirin Adı Yok https://diyane.kaffed.org/images/diyane/sosrkuo_1.jpg Diyane